ബേഡകം മുന്നാട് മദ്യലഹരിയിൽ ഭാര്യയെയും ബന്ധുവായ യുവാവിനെയും ആസിഡ് ഒഴിച്ച് പൊളളലേൽപ്പിച്ചു

കാസർകോട്: മദ്യലഹരിയിൽ ഭാര്യയെയും ബന്ധുവായ യുവാവിനെയും ആസിഡ് ഒഴിച്ച് പൊളളലേൽപ്പിച്ചു. സംഭവത്തിൽ 59 കാരൻ അറസ്റ്റിലായി. ചമ്പക്കാട്ടെ ജാനകി(54), സഹോദരിയുടെ മകൻ സുരേഷ് എന്നിവർക്കാണ് പൊള്ളലേറ്റത്. ഇവരെ കാസർകോട്ടെ ആശുപത്രിയിൽ പ്രവേശിപ്പിച്ചു. ചൊവ്വാഴ്ച വൈകീട്ട് മുന്നാട് ചമ്പക്കാട് ആണ് സംഭവം. മദ്യപാനിയായ രവീന്ദ്രൻ വീട്ടിൽ സ്ഥിരമായി പ്രശ്നം സൃഷ്ടിച്ചിരുന്നു. ഇതേ തുടർന്ന് ജാനകി മക്കളും മറ്റൊരു വീട്ടിലാണ് താമസിച്ചിരുന്നത്. കഴിഞ്ഞ രണ്ടുദിവസമായി ജാനകി താമസിക്കുന്ന വീട്ടിലെത്തിയും ഉപ്രദവം ആരംഭിച്ചു. ചൊവ്വാഴ്ച വൈകീട്ട് വീടിന് പുറത്ത് പാത്രം കഴുകിക്കൊണ്ടിരുന്ന ജാനകിയുടെ ദേഹത്തേക്ക് രവീന്ദ്രൻ ആസിഡ് ഒഴിക്കുകയായിരുന്നു. ഈ സമയത്ത് അവിടെയുണ്ടായിരുന്ന മകൾക്ക് നേരെയും ആസിഡ് ഒഴിക്കാൻ ശ്രമിച്ചു. വീട്ടിനകത്തേക്ക് ഓടിയതിനാൽ ആസിഡ് ആക്രണണത്തിൽ നിന്ന രക്ഷപ്പെട്ടു. ബഹളം കേട്ടാണ് ജാനകിയുടെ സഹോദരിയുടെ മകൻ സുരേഷ് വീട്ടിലെത്തിയത്. യുവാവിന് നേരെയും രവീന്ദ്രൻ ആസിഡ് ആക്രമണം നടത്തി. പൊള്ളലേറ്റ ഇരുവരെയും നാട്ടുകാരാണ് കാസർകോട്ടെ ആശുപത്രിയിൽ പ്രവേശിപ്പിച്ചത്. വീടിന് സമീപം തടിച്ചുകൂടി നാട്ടുകാരുമായി പ്രശ്നമുണ്ടാക്കുന്നതിനിടെ ബേഡകം പൊലീസെത്തി രവിന്ദ്രനെ കസ്റ്റഡിയിലെടുക്കുകയായിരുന്നു.