ചെങ്കള പഞ്ചായത്തിലെ നായന്മാർമൂലയിലെ സോഫ്റ്റ് ഡ്രിങ്ക്സ് നിർമ്മാണ യൂണിറ്റിൽ വൻ തീപിടുത്തം.

കാസർകോട്: ചെങ്കള പഞ്ചായത്തിലെ നായന്മാർമൂലയിലെ സോഫ്റ്റ് ഡ്രിങ്ക്സ് നിർമ്മാണ യൂണിറ്റിൽ വൻ തീപിടുത്തം. ഫയർഫോഴ്സിന്റെ സമയബന്ധിതമായ ഇടപെടലിലൂടെ  ഒഴിവായത് വൻ ദുരന്തം.  ചെങ്കള മൂന്നാം വാർഡ് നായന്മാർമൂലയിലെ കല്പക ഹൗസ് മുഹ്സിന്റെ  'ഫാക്കിയ സോഫ്റ്റ് ഡ്രിങ്ക്സ്' എന്ന സ്ഥാപനത്തിനാണ് തീപിടിച്ചത്.

​ശനിയാഴ്ച പുലർച്ചെ ഒരു മണിയോടെയായിരുന്നു സംഭവം. ഫാക്ടറി പരിസരത്ത് കൂട്ടിയിട്ടിരുന്ന വിറകിനും ചകിരിക്കുമാണ് ആദ്യം തീപിടിച്ചത്. അഗ്നിശമനസേന ഉടനടി സ്ഥലത്തെത്തി പ്രവർത്തനം ആരംഭിച്ചതിനാൽ തീ ഫാക്ടറിക്ക് അകത്തേക്ക് പടരാതെ സംരക്ഷിക്കാൻ സാധിച്ചു.

​ കാസർകോട് സ്റ്റേഷനിൽ നിന്ന് രണ്ട് യൂണിറ്റുകളും, ഉപ്പള, കാഞ്ഞങ്ങാട് സ്റ്റേഷനുകളിൽ നിന്ന് ഓരോ യൂണിറ്റുകളും സ്ഥലത്തെത്തി.

​ പുലർച്ചെ 1 മണിക്ക് ആരംഭിച്ച രക്ഷാപ്രവർത്തനം 3 മണിയോടെ തീ പൂർണ്ണമായും അണച്ചു.

​ഫയർഫോഴ്സിന്റെ കൃത്യസമയത്തുള്ള ഇടപെടൽ മൂലം ലക്ഷക്കണക്കിന് രൂപയുടെ നാശനഷ്ടങ്ങളാണ് ഒഴിവായത്.കാസർകോട് അഗ്നിരക്ഷനിലയം അസി. സ്റ്റേഷൻ ഓഫീസർ എ ജാഫർ ഖാൻ, സീനിയർ ഫയർ ആൻഡ് റെസ്ക്യൂ ഓഫീസർ വി. സുകു എന്നിവരുടെ നേതൃത്വത്തിൽ 25 ഓളം സേനാംഗങ്ങൾ രക്ഷപ്രവർത്തനത്തിൽ പങ്കെടുത്തു