പനത്തടി ഗ്രാമപഞ്ചായത്തിൽ കുടിവെള്ള വിതരണത്തിന് ക്വട്ടേഷൻ ക്ഷണിച്ചു

പനത്തടി: 2026 വർഷത്തെ വറുതി ആശ്വാസ പ്രവർത്തനങ്ങളുടെ ഭാഗമായി പനത്തടി ഗ്രാമപഞ്ചായത്തിലെ വിവിധ വാർഡുകളിൽ കുടിവെള്ള വിതരണം നടത്തുന്നതിനായി ക്വട്ടേഷൻ ക്ഷണിച്ചു. പഞ്ചായത്തിലെ വാട്ടർ കിയോസ്കുകളിലും കുടിവെള്ളക്ഷാമം നേരിടുന്ന മറ്റ് പ്രദേശങ്ങളിലും നേരിട്ട് വെള്ളമെത്തിക്കുന്നതിനാണ് ഈ പദ്ധതി.

വിതരണത്തിനായി ഏറ്റവും കുറഞ്ഞത് 4000 ലിറ്റർ ശേഷിയുള്ള വാട്ടർ ടാങ്കുകൾ ഘടിപ്പിച്ച വാഹനങ്ങളാണ് ഉപയോഗിക്കേണ്ടത്. വാഹനങ്ങളിൽ ജി.പി.എസ് (GPS), പമ്പ് സെറ്റ് എന്നീ സൗകര്യങ്ങൾ നിർബന്ധമായും ഉണ്ടായിരിക്കണം. കൂടാതെ, കുടിവെള്ള വിതരണം നടത്തുന്ന വാഹനങ്ങളിൽ 'പനത്തടി ഗ്രാമപഞ്ചായത്ത് കുടിവെള്ള വിതരണം' എന്ന് വ്യക്തമായി എഴുതിയ ബോർഡോ ബാനറോ പ്രദർശിപ്പിക്കേണ്ടതാണ് . കേരള വാട്ടർ അതോറിറ്റിയുടെ സ്രോതസ്സുകളിൽ നിന്നോ പഞ്ചായത്ത് നിർദേശിക്കുന്ന ഇടങ്ങളിൽ നിന്നോ മാത്രമേ വെള്ളം ശേഖരിക്കാൻ പാടുള്ളൂ . വിതരണം രാവിലെ 8 മണി മുതൽ വൈകിട്ട് 6 മണി വരെയുള്ള സമയങ്ങളിൽ മാത്രമായിരിക്കണം നടത്തേണ്ടത് .

ക്വട്ടേഷൻ ഫോറത്തിന് 500 രൂപയും (ജി.എസ്.ടി പുറമെ) നിരതദ്രവ്യമായി 5000 രൂപയും നൽകേണ്ടതുണ്ട്. താൽപ്പര്യമുള്ള കരാറുകാർ പൂരിപ്പിച്ച ക്വട്ടേഷനുകൾ 2026 മാർച്ച് 27-ന് വൈകുന്നേരം 3 മണിക്ക് മുൻപായി പഞ്ചായത്ത് സെക്രട്ടറിക്ക് സമർപ്പിക്കേണ്ടതാണ്. ലഭിച്ച ക്വട്ടേഷനുകൾ അന്നേ ദിവസം വൈകുന്നേരം 4 മണിക്ക് അപേക്ഷകരുടെ സാന്നിധ്യത്തിൽ പരിശോധിക്കും. തിരഞ്ഞെടുക്കപ്പെടുന്ന വ്യക്തി 200 രൂപയുടെ മുദ്രപ്പത്രത്തിൽ പഞ്ചായത്തുമായി കരാറിൽ ഏർപ്പെടേണ്ടതാണ്. കൂടുതൽ വിവരങ്ങൾ പനത്തടി ഗ്രാമപഞ്ചായത്ത് ഓഫീസിൽ നിന്നും ലഭ്യമാണ്.