പ്രവാസി വ്യവസായിയെ വധിക്കാന്‍ ശ്രമിച്ച കേസ്: യൂട്യൂബര്‍ ഖാദര്‍ കരിപ്പൊടി പോലീസില്‍ കീഴടങ്ങി
ഉദുമ സ്വദേശിയായ പ്രവാസി വ്യവസായി അബ്ദുല്‍ അഹദിനെ വധിക്കാന്‍ ശ്രമിച്ച കേസിലാണ് നടപടി. മുന്‍കൂര്‍ ജാമ്യത്തിനായി ഖാദര്‍ കരിപ്പൊടി നേരത്തെ കാസര്‍കോട് ജില്ലാ സെഷന്‍സ് കോടതിയെയും തുടര്‍ന്ന് ഹൈക്കോടതിയെയും സമീപിച്ചിരുന്നെങ്കിലും രണ്ടു കോടതികളും ഹര്‍ജി തള്ളിയിരുന്നു. ഇതിന് പിന്നാലെയാണ് സുപ്രീം കോടതിയെ സമീപിച്ചത്. എന്നാല്‍ ആരോപണങ്ങളുടെ ഗൗരവവും വിവിധ സ്റ്റേഷനുകളിലായി പ്രതിക്കെതിരെയുള്ള പത്തോളം ക്രിമിനല്‍ കേസുകളും കണക്കിലെടുത്ത് സുപ്രീം കോടതിയും ജാമ്യാപേക്ഷ നിരസിച്ചു. കൂടാതെ അന്വേഷണ സംഘത്തിന് മുന്നില്‍ ഉടന്‍ ഹാജരാകാനും കോടതി കര്‍ശന നിര്‍ദേശം നല്‍കി. ഇതോടെ മറ്റ് വഴികളില്ലാതെയാണ് ഖാദര്‍ സ്റ്റേഷനിലെത്തി കീഴടങ്ങിയത്.
സാമ്പത്തിക തര്‍ക്കം വധശ്രമത്തിലേക്ക്
ഗള്‍ഫിലെ സാമ്പത്തിക ഇടപാടുകളുമായി ബന്ധപ്പെട്ട തര്‍ക്കമാണ് ക്രൂരമായ അക്രമത്തിലേക്ക് നയിച്ചതെന്നാണ് കേസ്. റോഡിലിട്ട് ഇന്റര്‍ലോക്ക് കട്ടകള്‍ ഉപയോഗിച്ച് മര്‍ദ്ദിക്കുകയും പേനാക്കത്തി കൊണ്ട് കുത്തിക്കൊലപ്പെടുത്താന്‍ ശ്രമിക്കുകയും ചെയ്തുവെന്ന് അബ്ദുല്‍ അഹദ് പോലീസിന് നല്‍കിയ പരാതിയില്‍ പറയുന്നു. ആക്രമണത്തില്‍ അഹദിന്റെ മുഖത്തും കൈകാലുകള്‍ക്കും ഗുരുതരമായി പരിക്കേറ്റിരുന്നു.
സംഭവത്തില്‍ ഖാദര്‍ കരിപ്പൊടിയെ കൂടാതെ കണ്ടാലറിയാവുന്ന മറ്റ് രണ്ട് പേര്‍ക്കെതിരെയും പോലീസ് കേസെടുത്തിട്ടുണ്ട്:
പ്രതികള്‍: ഖാദര്‍ കരിപ്പൊടി, റാഷിദ് (സാക്കി), അഷ്‌റഫ്
ചുമത്തിയ വകുപ്പുകള്‍: ഏഴ് വര്‍ഷം വരെ തടവുശിക്ഷ ലഭിക്കാവുന്ന കടുത്ത വകുപ്പുകള്‍ പ്രകാരമാണ് കാസര്‍കോട് ടൗണ്‍ പോലീസ് കേസ് രജിസ്റ്റര്‍ ചെയ്തിട്ടുള്ളത്.
പോലീസ് പ്രതിയുടെ അറസ്റ്റ് രേഖപ്പെടുത്തി കോടതിയില്‍ ഹാജരാക്കാനുള്ള നടപടികള്‍ ആരംഭിച്ചു.
No comments