വീട്ടുമുറ്റത്ത് നാലാം ക്ലാസുകാരിയുടെ നാരങ്ങ മിഠായി കച്ചവടം; ആദ്യലാഭം 500രൂപ കുഞ്ഞുകൈയ്യിലൂടെ അതിജീവന കേരളത്തിന്

അമ്പലത്തറ: ഇത് നത ലത്തീഫ്. നാലാം ക്ലാസ്സുകാരി, ബാലസംഘം കൂട്ടുകാരി. പാറപ്പള്ളി കാട്ടിപ്പാറയിലെ ലത്തീഫ്-ജംസ ദമ്പതികളുടെ മകൾ. ''ഉപ്പാ എനിക്ക് നാരങ്ങ മിഠായിയും, ഉപ്പിലിട്ട മാങ്ങയും, ഐസുമൊക്കെ വിൽക്കാൻ വീടിനോട് ചേർന്ന് ഒരു കുഞ്ഞു കട ഉണ്ടാക്കി തരുമോ " എന്ന നത മോളുടെ ചോദ്യത്തെ തുടർന്നാണ് ഉപ്പ ലത്തീഫ് ഒരു കുഞ്ഞു കട വീടിനോട് ചേർത്ത് മോൾക്കായി ഉണ്ടാക്കിക്കൊടുത്തത്. കഴിഞ്ഞ 7 ദിവസമായി നത മോൾ അവിടിരുന്ന് 'കച്ചവടം' ചെയ്യുകയാണ്. എല്ലാ ദിവസവും ഉപ്പയുടെ കൂടെയിരുന്ന് മുഖ്യമന്ത്രിയുടെ വാർത്താ സമ്മേളനം കാണുന്ന ശീലം നത മോൾക്കുണ്ട്. ഇന്നലെ നത മോൾ ഉപ്പയോട് പറഞ്ഞു ''ഉപ്പാ എൻ്റെ കച്ചോടം കൊയപ്പൂല, 500 രൂപ ലാഭം കിട്ടീറ്റിണ്ട്, ആ പൈസ എൻക്ക് നമ്മളെ മുഖ്യമന്ത്രിക്ക് കൊടുക്കണം".  കേരളത്തിൻ്റെ അതിജീവന പോരാട്ടത്തിൽ അണി ചേരാൻ ആ കുഞ്ഞു മനസ്സും സ്വയം സന്നദ്ധമാവുകയായിരുന്നു. യാതൊരു വിധ പ്രേരണയോ നിർദ്ദേശമോ ഇല്ലാതെയാണ് ഈ കുഞ്ഞു ശരീരത്തിലെ വലിയ മനസ് ഇത്തരമൊരാശയവുമായി മുന്നോട്ടു വന്നത്. CMDRF ലേക്ക് നൽകാൻ ആ തുക നത മോൾ പുല്ലൂർ-പെരിയ ഗ്രാമ പഞ്ചായത്ത് 7-ാം വാർഡ് മെമ്പർ എ.വി.കുഞ്ഞമ്പുവിനെ ഏൽപ്പിച്ചു. ബാലസംഘം ജില്ലാ കമ്മിറ്റി അംഗം സുനിൽ പാറപ്പള്ളി, സുനിൽകുമാർ കുമ്പള എന്നിവർ സംബന്ധിച്ചു. സമ്പാദ്യക്കുടുക്ക പൊട്ടിച്ചും, വിഷുക്കൈനീട്ടം നൽകിയുമൊക്കെ ഇങ്ങനെ ഒരുപാടൊരുപാട് കുഞ്ഞു നതലത്തീഫുമാർ നമുക്ക് ചുറ്റും ഉണ്ടായിക്കൊണ്ടിരിക്കുമ്പോൾ കേരളം അതിജീവിക്കാതിരിക്കുക തന്നെ ചെയ്യും